Ka disa muaj që Unioni Evropian ka vendosur masa ndëshkuese ndaj Kosovës si pasojë e mos de-eskalimit të gjendjes në pjesën veriore të vendit. Ndërkohë tash që rrjedha e situatës ka ndryshuar pas sulmit terrorist ndaj policisë së Kosovës, njohësit e proceseve politike kërkojnë lirimin e Kosovës nga këto masa, derisa bëjnë thirrje që të vihet para përgjegjësisë burimi i detsabilitetit në veri.
Për tensionet që ishin në veri të vendit tonë, përgjatë muajit maj e qershor të këtij viti, Unioni Evropian fajësoi Kosovën.
Andaj blloku evropian vendosi disa masa ndëshkuese, për mos de-eskalim të situatës atje.
E tash, zhvillimet e fundit në atë zonë, kur një grup terrorist serbë sulmoi policinë e Kosovës, konsiderohet se e vunë në pah, kush është burim destabiliteti atje.
Andaj për ish-diplomatin, Sylë Ukshini tani është koha që këto masa ndëshkuese ndaj Kosovës të hiqen.
“Fakti që 22 vende të BE-së e njohin Kosovën, e vetëm 5 jo por sillet sikur t’a njohin 5 e 22 vende jo tregon që ka një lloj asimetrie brenda Bashkimit Evropian. Unë mendoj që takimi i radhës Kosovën duhet ta gjejë pa masa ndëshkuese sepse nuk mund të ndëshkohet Kosova edhe nga BE edhe të ketë agresion politik, ekonomik, kulturor, propagandistik e në fund edhe ushtarak”, ka thënë ish diplomati, Sylë Ukshini.
Duke folur për dialogun, ai e vë pikëpyetje ecurinë e mëtutjeshme të tij.
“Është e paprecedentë në historinë e Evropës kur një shtet mbështet hapur grupe kriminale dhe terroriste. Unë mendoj se nëse nuk ka ndonjë distancim të qartë edhe nga Vuçiqi edhe nga derivati I tij në Kosovë, Lista Serbe, nuk e di për çfarë normalizimi mund të flitet në raportet Kosovë – Serbi”, është shprehur Ukshini.
Se tani është koha që Kosovës t’i hiqen masat ndëshkuese e thotë edhe njohësi i rrethanave politike Gazmir Raci.
“Serbia është shkelësja më e madhe e të gjitha marrëveshjeve të dialogut të Brukselit. Fatkeqësisht është ndëshku Kosova njëanshëm. Andaj është moment kritik që këto masa me u heq prej Kosovës dhe natyrisht Serbia me u thirr në përgjegjësinë e saj sepse bëri agression dhe sponsorizoi sulmin terrorist mbi Policinë e Kosovës, këtë tashmë e ka konfirmu edhe vet BE- ja”, ka deklaruar njohësi i çështjeve politike, Gazmir Raci.
Përfaqësues të shteteve anëtare të BE-së të martën kishin një takim, në të cilin diskutuan për zhvillimet e fundit në Kosovë.
Aty u tha se pasi të vërtetohen të gjitha rrethanat dhe faktet e asaj që ka ndodhur më 24 shtator në fshatin Banjskë në veri të Kosovës, vendet anëtare do të marrin vendime rreth masave dhe hapave të mundshëm.
