Kryetari i PDK-së, Memli Krasniqi sot bashkë me kolegë e miq ka vizituar familjen Bunjaku në Samadrexhë, për t`i shprehur ngushëllimet për policin Afrim Bunjaku.
Ai ka thënë se vrasja e policit është humbje e pazëvendësueshme për familjen, miqtë, kolegët dhe shtetin e Kosovës.
“Sot, me kolegë dhe miq, ishim në familjen Bunjaku në Samadrexhë, për t’u shprehur ngushëllimet më të thella për vrasjen e Afrimit, Heroit të Kosovës. Vrasja e tij është humbje e pazëvendësueshme për familjen, miqtë, kolegët dhe shtetin tonë. Por, flijimi i tij në mbrojtje të sovranitetit shtetëror është krenaria e përjetshme që do ta bëjë emrin e tij të pavdekshëm. Tani, është në përgjegjësinë e secilit prej nesh, që përmes punës e angazhimit dinjitoz dhe të parezervë për Kosovën, ta nderojmë sakrificën sublime të rreshterit Afrim Bunjaku dhe kujtimin për Heroin më të ri të Republikës tonë. Lavdi!”, ka shkruar Krasniqi. /teve1.info/
Të dielën, Afrim Bunjaku ra në krye të detyrës, përderisa u vra nga një grup teroristë serb.
