Eksperti i sigurisë, Valdet Hoxha bën të ditur se armatimi i tillë i sekuestruar si ai në manastirin e Banjskës është i pamundur të ndalet, për shkak të specifikave të asaj pjese të vendit.
Siç thotë ai, për shkak të specifikave të rajonit, kontrollat në pikat kufitare me Serbinë janë të pamundura të bëhen në detaje.
“Vija kufitare me Serbinë është vija më e gjatë prej të gjitha shteteve me të cilat kufizohemi. Prandaj është e pamundur të ndalet një tregti apo një armatim i tillë që të hyjë në Kosovë, për shkak të specifikave të rajonit, sepse pavarësisht që i kemi ne mekanizmat tanë në pikat kufitare 1 dhe 31, vija kufitare dhe vija e gjelbër kufitare është aq e gjatë dhe aq e gjerë, saqë e bën të pamundur kontrollën në aq në detaje. Prandaj duke njohur edhe specifikat e asaj pjese të vendit tonë, po besoj që është e mundshme që përmes rrugëve ilegale të futet një armatim i tillë, por natyrisht është shkelje e rëndë kushtetuese dhe është sulm dierkt ndaj rendit kushetues të Republikës së Kosovës”, deklaroi ai në “Këndi i Debatit” në Tëvë 1.
Hoxha theksoi se dënimi për vepra të tilla është së paku 10 vjet deri në burgim të përjetshëm.
“Prandaj edhe parashihet dënimi mjaft i rëndë për vepra të tilla dhe unë po besoj që nëse vërtetohet, dhe po besoj që faktet të paktën supozohen që janë, nëse vërteohet që ata kanë bërë një organizim të tillë kundër rendit kushtetues…dënimi për këto vepra penale është së paku 10 vite deri në burgim të përjetshëm”, shtoi eksperti i sigurisë.
Tre terroristë serbë deri më tani janë konfirmuar të vrarë në sulmin i cili ishte përgatitur ndaj Policisë së Kosovës në fshatin Banjskë të Zveçanit, ku si pasojë mbeti i vrarë rreshteri kosovar, Afrim Bunjaku. /Teve1.info/