Këtë numër të madh të qytetarëve, e bëri bashkë heroi më i ri i Kosovës, Afrim Bunjaku.
Rrugën drejt Samadrexhës së Vushtrrisë e morën për t’i dhënë lamtumirën e fundit rreshterit të policisë, i cili u vra në detyrë.
E pak metra larg trupit të tij, me lule në duar e dhimbje në fytyrë janë bashkëshortja dhe tre fëmijët që i ndjeri la pas.
E gjithë ceremonia e varrimit u bë me nderime të larta shtetërore.
Fjalë krenarie për policin që u vra në veri, pati shefja e shtetit Vjosa Osmani.
Nderime për veprën e tij patën edhe kryeministri i vendit Albin Kurti dhe kryeparlamentari Glauk Konjufca.
Ndërsa drejtori i policisë, Gazmend Hoxha duke kujtuar Bunjakun tha se është krenar për çdo pjesëtarë të policisë së Kosovës.
E për gjithë këta njerëz të pranishëm, falënderime pati nga familjarët.
Arton Bunjaku thotë se qytetarët e Kosovës ia kanë lehtësuar këtë dhimbje të madhe.
Në të gjitha anët pati zyrtarë të policisë së Kosovës dhe zyrtarë të shumtë të Njësive Speciale të Kosovës. Rreth trupit të tij mbetën vetëm kolegët me uniformën e policisë.
Të njëjtit, simbolin e tyre dhe fotografinë ia dorëzuan bashkëshortes dhe djalit.
Pas kryerjes së procedurës shtetërore, trupin e pajetë të tij e nisën për në varreza.
Prezent në këtë ceremoni ishin shumë personalitete publike, ministra të Qeverisë Kurti, deputetë të pozitës dhe opozitës, kryetarë të komunave të Kosovës, ambasadorë të vendeve të huaja si dhe përfaqësues të Shqipërisë, Maqedonisë së Veriut dhe Malit të Zi.