Po vazhdon të rritet numri i policëve të Policisë së Kosovës që patrullon në pjesën kryesore të fshatit Banjskë, aty ku sot në orët e para të mëngjesit është sulmuar Policia e Kosovës,e ku një polic ka mbetur i vrarë e një tjetër i plagosur.
Kështu ka bërë të ditur ekipi i Tëvë1, të cilët po qëndrojnë në pikën kryesore, në udhëkryqin e fshatit Banjskë të Leposaviqit.
Gazetari, Shpat Blakçori thotë se situata vazhdon të jetë e tensionuar.
“Normalisht që vazhdon të jetë një situatë e tensionuar, ka një numër të madh të mediave. Nuk ka lëvizje të banorëve serbë që jetojnë në këtë pjesë të vendit, por ka një numër të madh të njësisë policore dhe njësiteve të EULEX-it. Ndërsa, në një rrugë alternative ka pasur lëvizje të automjeteve të KFOR-it edhe të njësiteve të EULEX-it. Ndërkaq, në pikën kryesore të fshatit Banjskë ka vetëm lëvizje të Policisë së Kosovës”, raporton Blakçori.
Tutje, ai thotë se janë duke u dëgjuar vazhdimisht të shtëna me armë zjarri.
“Vazhdojnë gjuajtjet me armë zjarri, por ka edhe rritje të vazhdueshme të numrit të policëve së bashku me mjetet dhe njësitet e EULEX-it që po patrullojnë në këtë pjesë. Mediave iu është ndaluar ta kalojnë kordonin e policisë për të kaluar në pjesën tjetër të fshatit”, tha ai./teve1.info/
