Opozitarizmi i Partisë Demokratike të Kosovës pritet të marrë formë tjetër, duke krijuar një organizim të qeverisë në hije.
Këshilli drejtues i kësaj partie, ka miratuar vendimin për krijimin e siç quhet, Kabinetit të Qeverisjes së mirë.
Zëdhënësi i PDK-së, Faton Abdullahu, tha se pjesë e këtij kabineti do të jenë edhe ata që nuk kanë lidhje me partinë.
“Me krijimin e kabinetit të qeverisjes së mirë, opozitarizmi në Kosovë po hyn në një etapë të re të opozitarizmit. Ne këtë do ta bëjmë duke qenë shumë të hapura për kuadro nga më të ndryshme profesionale, që nuk kanë detyrimisht ndonjë lidhje të tashme ose nga e kaluara me Partinë Demokratike, por aty do të kemi edhe kuadro nga partia demokratike, nga strukturat, nga deputetët, nga anëtarët e kryesisë, të cilët të gjithë bashkë kanë një qëllim, ta japim një alternativë të mirë, nga ajo që sot po e shohin qytetarët e Kosovës, e që nuk është alternativë e mirë”, tha ai.
Tutje, Abdullahu tha se ky kabinet do të ketë 15 dikastere, e që secila nga to, do ta përbehet nga një grup ekspertësh.
“Në dikastere të caktuara, apo në ministri për ta bërë më të qartë, nuk do të ketë nga një njeri, nga një përfaqësues, por do të ketë grupe, nga disa grupe. Pra në digastere të caktuara do të ketë koordinatorë dhe ndihmës të tjerë. Pra, do të ketë ekipe, profesionale, partiake e të tjera, që do t’i menaxhojnë dikasteret e ndryshme”, shtoi ai.
Kjo lloj qeverie nuk do t’i ketë ministritë e ngjashme me qeverinë e Kurtit, për shembull, diasporën e ka të ndarë si dikaster në vete.
Një organizim të tillë, që në atë kohë njihej si qeveria nën hije, PDK e pati nisur edhe më 1 qershor të vitit 2005. E Kabineti i Qeverisjes së Mirë, sipas zyrtarëve të PDK-së, pritet të themelohet në ditët në vijim.
Raporti i gazetarit Valmir Gallopeni.
