Nikaj tha se kabineti i “Qeverisë në hije” ka për qëllim që të vendos dhe të formësojë një alternativë ndaj qeverisjes e cila gjendet në pushtet.
“Për ne në Partinë Demokratike të Kosovës është e rëndësishme që ne të normalizojmë opozitarizmin në vend duke krijuar një vizion dhe duke propozuar një kabinet të asaj se si ne e shohim edhe strukturën e qeverisë edhe qeverisjen në tanësi. Dhe përmes këtij kabineti të qeverisë së mirë Partia Demokratike e Kosovës mëton të propozojë një vizion të saj për qeverisje në vend në fusha të ndryshme të cilat nuk do të jenë domosdoshmërisht një pasqyrë e organizimit aktual”, tha Nikaj, shkruan teve1.info
Ai shtoi se ideja është që përmes kabinetit të “Qeverisjes së mirë”, mos të jetë një opozitë e cila vetëm kritikon, por një opozitë e cila ofron alternativa dhe ndërton politika.
Nikaj shtoi se tani në pushtet është një parti e cila ka treguar se është e papërgatitur për të qeverisur, duke iu referuar Lëvizjes Vetëvendosje, pasi që siç thotë ai, të njëjtit kanë kërkuar kohë që të kryejnë planifikime. Sipas tij, kjo tregon papjekuri qeverisëse.
“Ne jemi momentalisht në një situatë ku në qeveri kemi një parti e cila ka kaluar më shumë se 15 vjet në opozitë dhe në momentin kur ka ardhur në qeveri na thotë neve dhe ju thotë qytetarit të Kosovës na jepni edhe pak kohë sepse neve na nevojitet që të planifikojmë. Kjo është një praktikë e cila nuk është praktikë e zakonshme dhe është një praktikë e cila tregon një papjekuri qeverisëse dhe një papërgatitje të qeverisë aktuale për të qeverisur”, potencoi Nikaj. /Teve1.info/
