Drejtoria Rajonale e Policisë së Prishtinës është informuar lidhur me shqetësimet e ngritura në publik pas pamjeve të publikuara ndërlidhur me pretendimet për sjellje të papërshtatshme, në kundërshtim me etiken, apo me nuanca dhune, nga ana e disa edukatoreve në një kopsht fëmijësh në Fushë Kosovë.
Pas publikimit të pamjeve të tilla ne kemi marrë seriozisht pretendimet e ngritura dhe menjëherë kemi filluar një hetim preliminar për çështjen.
Drejtoria Rajonale e Policisë në Prishtinë, ka njoftuar se është duke mbledhur të gjitha provat e mundshme lidhur me rastin ku një trevjeçar është rrahur në një çerdhe në Fushë – Kosovë.
Policia përmes një komunikate ka bërë të ditur se të gjitha veprimet janë duke u bërë në koordinim me Prokurorinë e Shtetit.
“Aktualisht zyrtarët policor po vijojnë punën për mbledhjen e të gjitha provave që janë të arritshme, intervistimin e personave që në çfarëdo rrethane dhe çfarëdo cilësie kanë mundur të jenë të implikuar në rast, po shqyrtohen raportet mjekësore, pamjet e publikuara si dhe po analizohen ato. Veprimet policore po koordinohen me prokurorin e shtetit si dhe po bashkëpunojmë ngushtë me të gjitha agjencitë për mbrojtjen e fëmijëve dhe autoritet e tjera përkatëse”, thuhet në komunikatë.
Policia thotë se e kupton shqetësimin e komunitetit e sidomos të prindërve, por thotë se duhet siguruar që hetimet të kryhen në mënyrë profesionale.
“Për ne siguria dhe mirëqenia e fëmijëve është ndër prioritetet kryesore por njëkohësisht jemi të përkushtuar për të kryer një hetim profesional dhe të paanshëm, për të zbardhur të vërtetën dhe për të ndërmarrë veprimet e duhura bazuar në gjetjet e hetimit. Vlerësojmë komunitetin për mirëkuptimin dhe sigurojmë që ne nuk do të kursejmë asnjë përpjekje që vendi ynë të mbetet i sigurt për të gjithë”, thuhet nga Policia.
Të hënën në mbrëmje familjar të fëmijës kanë publikuar pamje se si një fëmijë në çerdhen “Gëzimi – ynë” është rrahur nga edukatoret. Të martën në vend ngjarje kanë dalë Policia e Kosovës dhe inspektorët e Arsimit.
Tri edukatoret janë intervistuar nga Policia, ku avokati i njërës ka thënë se rasti është ekzagjeruar.
Ndërsa, avokati i familjes Geci ka thënë se edukatoret kanë kryer së paku tri vepra penale.