Sot në Kuvendin e Kosovës, në debat parlamentar po diskutohet lidhur me vendimin e Qeverisë për sigurimin e teksteve shkollore për nxënësit e nivelit të arsimit fillor dhe arsimit të mesëm të ulët për vitin shkollor 2023/2024.
Me ç’rast, Ministrja e Arsimit, Arbërie Nagavci, gjatë seancës plenare në Kuvend, tha se deri më tani asnjë komunë nuk është ankuar që ka mungesë apo vështirësi me tekstet shkollore, raporton teve1.info.
“Nga asnjë komunë nuk kemi marrë njoftim që kanë mungesë apo vështirësi me tekstet shkollore, derisa ne me kohë i kemi njoftuar që duhet të kujdesen për ruajtjen e teksteve. Vetëm javën e kaluar kemi pasur së paku tre vizita pothuajse në të gjitha komunat e Kosovës, ku nuk ka informata që ka mungesë. Në ato raste kur ka pasur deklarime publike, kinse nga drejtorët e arsimit, kinse mësimdhënësit po i detyrojnë nxënësit të qëndrojnë me një këmbë, mirëpo nga raportet zyrtare që i kemi pranuar, nga vetë të njëjtit drejtorë komunalë, nuk kanë asnjë rast të konfirmuar”, deklaroi Nagavci para deputetëve në Kuvend.
Kjo seancë është thirrur nga opozitarët , për “dështimet e Qeverisë” për sigurimin e teksteve shkollore për nxënësit./teve1.info/.