Grupi i Asamblistëve të Lëvizjes Vetëvendosje në Prishtinë, ka njoftuar se nuk do të marrë pjesë në seancën Kuvendin Komunal, e thirrur për të hënën, 4 shtator.
Arsyeja sipas komunikatës është se LVV e konteston zgjedhjen e Kryesuesit të ri të Kuvendit Komunal.
Siç jeni në dijeni, për ne, është e kontestueshme zgjedhja e Kryesuesit të ri dhe rrjedhimisht e kontestojmë edhe ftesën për këtë seancë që vjen nga një autoritet për legjitimitetin e të cilit do të vendosin organet e drejtësisë. Duke ditur faktin se tashmë në Gjykatën Themelore në Prishtinë është iniciuar një konflikt administrativ në mes të MAPL-së dhe Komunës së Prishtinës, ndër të tjera edhe për çështjen e Kryesuesit, vlerësojmë se thirrja dhe organizimi i kësaj mbledhje në këtë kohë është i panevojshëm dhe tendencioz”, thuhet në komunikatë.
Asamblistët e LVV-së i kanë bërë thirrje koalicionit qeverisës në kryeqytet që të mos marrin vendime në këtë periudhë si dhe nga Gjykata Themelore në Prishtinë kanë kërkuar që çështja e kryesuesit të trajtohet me urgjencë.
“Kërkojmë nga partitë në pushtet në Komunën e Prishtinës, koalicioni LDK-PDK-NISMA-LB, të përmbahen nga çfarëdo vendimi e veprimi në këtë fazë dhe gjithashtu kërkojmë nga Gjykata Themelore në Prishtinë që sa më parë, me prioritet, ta trajtoj çështjen në fjalë. Kthimi i ligjshmërisë në Komunën e Prishtinës është emergjencë dhe domosdoshmëri”, thuhet në komunikatë./teve1.info/
