Deputetja e LDK-së, Doarsa Kica-Xhelili thotë se skandalet qeveritare nuk pushuan gjatë gushtit. Sipas saj, nuk kishte as distancim nga ato skandale.
“Pamë justifikim. Pamë shtrembërim e lexim qëllimshëm të gabuar të ngjarjeve nga Qeveria. Pamë skandale që zinin skandalin paraprak, thuajse në tentativë ta relativizojnë njëra tjetrën”, ka shkruar ajo.
Megjithatë, sipas Kica-Xhelilit, pjesa më e dhimbshme është kur VV ende mundohet të flet se si do ta reformojnë drejtësinë.
“Pjesa më e dhimbshme, së paku për mua, është kur mundohen ende të flasin se si do ta reformojnë drejtësinë – e për këtë tashmë kam folur e i kam demantuar vazhdimisht”, ka shkruar ajo.
Kica-Xhelili tutje ka përmendur edhe rastin e zhdukjes së mostrave nga Instituti i Mjekësisë Ligjore.
“Të njëjtit që duke e kontrolluar Institutin e Mjekësisë Ligjore, lejuan që të zhduken mostra, madje duke pasur brenda zyrtar që ka afërsi me ta; të njëjtit që edhe pas gati tre vitesh, kur e shkatërruan procesin e Vetingut me faj të tyre, vazhdojnë t’i referohen sikur të ishte po ai proces. Sikur të mos kishte ndryshuar gjë”, ka shkruar ajo në Facebook.