Kryetari i Aleancës për Ardhmërinë e Kosovës, Ramush Haradinaj, ka thënë se informatat që i kanë lidhur me situatën me furnizim me tekstet shkollore janë shqetësuese.
Ai tha se kjo ju konfirmua edhe nga takimi me kryetarin e SBASHK-ut, Rrahman Jasharajn.
Haradinaj ka thënë se situata me librat nuk ka qenë e rastësishme. Sipas tij, Qeveria Kurti ka dashur prodhimin edhe të një krize që të ketë greva dhe të largohet vëmendja nga skandalet e Qeverisë.
“Nuk e kuptojë më falni në shprehje pafytyrësinë e Kurtit dhe ministres Nagavci, të paktën një kërkim falje… I bëjë thirrje Kurtit dhe kabinetit të tij të mos e tall Kosovën, një kërkim falje duhet për këtë situatë. Sipas meje kanë shpresu edhe në një krizë, me një grevë që Kosova mos me u merr me skandalet e Qeverisë, por me greva”, u shpreh Haradinaj, përcjell teve1.info.
Ai tha se gjendja financiare e mësimdhënësve është e rëndë, ndërsa u bëri thirrje mësimdhënësve dhe prindërve të bëjnë gjithçka që viti shkollor të nisë sa më mirë, sipas tij edhe në një situatë të vështirë.
