Ministria e Drejtësisë ka bërë të ditur se rreth 1.5 milion euro janë ndarë gjatë këtij viti për organizatat që strehojnë viktimat e dhunës në familje, ndërsa veçanërisht për strehimoren në Mitrovicë janë ndarë rreth 70 mijë euro.
Kjo u bë e ditur gjatë vizitës së ministres, Albulena Haxhiut dhe zëvendësministrit, Qorrolli të cilët vizituan sot Qendrën për mbrojtjen e grave dhe fëmijëve “Raba Voca” në Mitrovicë.
“Rreth 1.5 milion euro janë ndarë gjatë këtij viti nga Ministria e Drejtësisë, për organizatat që strehojnë viktimat e dhunës në familje, ndërsa veçanërisht për strehimoren në Mitrovicë janë ndarë rreth 70 mijë euro. Qendra për mbrojtjen e grave dhe fëmijëve gjatë këtij 8 mujori në këtë strehimore ka strehuar 80 të mbijetuara të dhunës në familje. Sa i përket sigurisë, Ministrja Haxhiu dhe Zëvendësministri Qorrolli u njoftuan nga drejtoresha, znj. Fidane Hyseni, se kryesisht nuk ka probleme në këtë qendër dhe se bashkëpunimin me policinë e Kosovës e kanë jashtëzakonisht të mirë dhe efektiv”, thuhet në njoftim.
Tutje behët e ditur se në këtë takim, Ministrja dhe zëvendësi u njoftuan që ende komuna e Mitrovicës, Skenderajt dhe Vushtrrisë, nuk kanë nënshkruar marrëveshjen me strehimoren për mbështetje financiare. Ministrja i njoftoi për veprimet që ka ndërmarrë në raport me këtë çështje dhe u zotua që do të jetë në komunikim me personat përgjegjës për zgjidhjen e kësaj çështje.
Ministrja Haxhiu dhe zëvendësi, vizituan edhe vendin ku kanë filluar punimet për ndërtimin e strehimores së re me mbështetjen e UNOPS, ku panë nga afër punën që po bëhet.
