Dilemat rreth vendimit të MASHTI-t po vazhdojnë.
Ndonëse ka mbetur edhe një javë për të filluar mësimi për vitin e ri shkollor, çështja e sigurimit të teksteve shkollore nuk dihet ende nëse do të arrihet të bëhet në kohën e duhur.
Lidhur me këtë ish-zv.ministri i Arsimit, Dukagjin Pupovci thotë se duhet të ketë verifikim dhe kontrollë të platformës, teksa dilema mbetet se si do vazhdojë rimbursimi meqë siç thotë ai ka edhe prindër që i kanë llogaritë e bllokuara për arsye të ndryshme.
“Sigurisht që do të ishte shumë më thjeshtë sikur librat të dërgoheshin në shkolla sikur vitet e kaluara por meqë një gjë e tillë nuk ka qenë e mundur mbetet të shohim si do të funksionojë kjo zgjidhje. Unë mendoj se duhet me i pa problemet me këtë portalin e-kosova sepse nuk është tashmë funksional dhe duhet me qenë në kontrollë që të aplikojnë vërtetë ata që janë prindër ose dikush që nuk është prind ose fëmijët e të cilit nuk janë në shkolla, pra duhet të ketë verifikim të aplikimeve dhe besoj se kjo do të jetë mjaftë sfiduese. Më pas kur verifikohen aplikimet dhe fillojnë pagesat mendoj se poashtu mund të ketë probleme edhe mes pagesave, mund të ketë xhirollogari të cilat mund të jenë të bllokuara …”, vlerësoi Pupovci.
Nga ana tjetër, nga Këshilli i Prindërve shpresojnë që premtimi i Ministrisë së Arsimit për rimbursimin e të hollave pas blerjes së teksteve shkollore, të bëhet përgjatë javës së ardhshme.
“Ishim në takim me Ministren e Arsimit, prej të cilës morëm informata që të hollat do të kalojnë në llogari gjatë javës së ardhshme, brenda javës së ardhshme të gjithë qytetarët e Kosovës kanë më u pajis me të holla për blerjen e librave përmes e-Kosova”, tha Enver Balaj, sekretar i Këshillit të Prindërve.
E përmes një përgjigjje elektronike njëra nga shtëpitë botuese në vend thotë se mesatarja e shpenzimeve për një nxënës pritet të jetë nga 40 deri në 60 euro.
“Ne po organizohemi me qytetet më të mëdha që janë afër dhe jemi ne dispozicion edhe për shitje online duke përfshirë edhe postën falas. Mesatarja e shpenzimeve 40-60 euro, varësisht prej klasës”, thuhet në përgjigjen e shtëpisë botuese “Albas”.
Nga ana e tyre, Zyra e Prokurorit të Shtetit përmes një përgjigjje elektronike për Tëvë1 thanë se deri më tash nuk ka pas kërkesë për vëzhgimin e këtij procesi lidhur me dyshimet se mund të ketë keqpërdorime të mjeteve.