Kryeministri Albin Kurti është pritur sot në takim nga kryeministri grek Kyriakos Mitsotakis në Athinë në Manastirin Maximos.
Sipas mediumit i grek “Amna” duke cituar burime qeveritare, raportohet se në takimin mes tyre është biseduar për vazhdimin e zhvillimit të marrëdhënieve dypalëshe me fokus bashkëpunimin ekonomik.
Për më tepër, Mitsotakis nënvizoi rëndësinë që Greqia i jep dialogut Beograd-Prishtinë për normalizimin e marrëdhënieve ndërmjet Kosovës dhe Serbisë.
Ndryshe, kryeministri i vendit, Albin Kurti ishte mbrëmë pjesë e darkës me liderët e shteteve të Ballkanit Perëndimor, me ftesë të homologut të tij nga Greqia, Kyriakos Mitsotakis.
Përmes një njoftimi nga Zyra e Kryeministrit bëhet e ditur se gjatë kësaj darke u diskutua për çështjet rajonale, teksa Kurti ka theksuar se të gjitha shtetet që duan të anëtarësohen në Bashkimin Evropian duhet ta zbatojnë demokracinë, sundimin e ligjit e fqinjësinë e mirë.
Pjesë e këtij takimi ishin edhe kryetarja e Komisionit Evropian, Ursula von der Leyen, presidenti i Këshillit Evropian, Charles Michel, presidenti i Ukrainës, Volodymyr Zelenskyy, kryeministri i Kroacisë, Andrej Plenkovic, kryeministri i Rumanisë, Marcel Ciolacu, kryeministri i Bullgarisë, Nikolai Denkov, dhe presidentja e Moldavisë, Maia Sandu. /Teve1.info/