Është arrestuar edhe personi i dytë, i cili dyshohet se ka sulmuar ekipin e gazetës ‘Nacionale’ në Prizren.
Lajmin për teve1.info e ka konfirmuar, zëdhënësi i Policisë së Kosovës, Shaqir Bytyqi, i cili tha se ai është arrestuar të martën dhe është caktuar masa e ndalimit për 48 orë.
“Në lidhje me rastin pas hetimeve me 15.08.2023 janë arrestuar dy të dyshuar meshkuj kosovarë dhe të njëjtit pas intervistimit me vendim të prokurorit, janë dërguar në mbajtje. Njëri është arrestuar më herët, ndërsa personi që u arrestua dje është ndaluar për 48 orë”, ka thënë ai.
Për këtë ngjarje policia ka njoftuar edhe për suspendimin e një zyrtari policor për 72 orë në Prizren, me gradën rreshter dhe disa zyrtarë tjerë janë duke u hetuar.
“Pas vlerësimit dhe analizimit të të gjitha raporteve si dhe videoregjistrimeve gjatë protestës, Drejtori Rajonal i Policisë së Kosovës për Rajonin e Prizrenit, pas konsultimit dhe me sugjerimin nga IPK, me qëllimi të hetimit të pavarur të këtij rasti, me vendim ka suspenduar për 72 orë një Rreshter Policor nga Stacioni Policor Prizren”, ka njoftuar PK.
Gazetari i Nacionales, Vullnet Krasniqi dhe kameramani, Arbër Latifi janë sulmuar fizikisht nga disa persona.
Krasniqi ka informuar redaksinë e Nacionales se përveç sulmit ndaj ekipit në terren, janë goditur edhe kamerat dhe mikrofoni i tyre.
Ky ështe sulmi i 54 ndaj gazetarëve dhe kameramanëve këtë vit, sipas faqes së AGK-së. Në vitin 2020, Kosova kishte regjistruar 24 sulme.
Sulmi ndaj ekipit të Nacionales në Prizren, suspendohet për 72 orë një rreshter policor
