Christophe Goddard, arkeolog ndërkombëtar i cili ishte pjesë e ekipit që zbuluan mbishkrimin e Perandorit Justinian, në lokalitetit Arkeologjik në Ulpianë, ka thënë se shprehet i befasuar me nivelin dhe cilësinë e trashëgimisë arkeologjike në Kosovë.
Ai ka thënë se zbulimi në këtë lokalitet është bërë falë një pune të përbashkët, ku pjesë e tij ka qenë edhe nga Arben Hajdari dhe Milot Berisha.
“Jam i befasuar nga niveli dhe cilësia e trashëgimisë arkeologjike të vendit. Arkeologët kosovarë janë duke u punuar dhe trajnuar në të njëjtat shkolla që kemi ndjekur ne, andaj kemi arritur rezultate të mira. Dhe një arsye për të pas suksese është të kemi edhe një ambient të mirë institucional”, ka thënë ai.
Sa i përket zbulimit në Ulpianë ai tha se bëhet fjalë për një objekt kishtar i punuar më kërkesë të perandorit.
Por e veçanta e këtij zbulimi sipas tij, është se kërkesa ka qenë tekstuale dhe se deri tash nuk kanë zbuluar një gjë të tillë.
“Kemi të bëjmë me një objekt kishtar i punuar më kërkesën e një perandori, i cili ka ndërtuar monumentet edhe të tjera siç është xhamia Aja Sofia në Stamboll. Në rastin tonë e kemi në formë tekstuale, që deri tash nuk kemi arritur të zbulojmë një gjë të tillë”, tha ai në emisionin “Ditari” në Tëvë1.
Ai ka thënë se ky zbulim do të nxisë vizitorë të huaj por edhe arkeolog të vendeve tjera.
Goddard ka falënderuar për mbështetjen institucionet e Kosovës, e në veçanti ministrin e Kulturës, Hajrullah Çeku, dhe drejtoreshën e Departamentit për Trashëgimi Kulturore.
