Presidentja e Kosovës, Vjosa Osmani ka pritur në takim zv/ministrin e Jashtëm të Turqisë, Mehmet Kemal Bozay.
Në këtë takim, Osmani ka diskutuar me turkun për bashkëpunimin bilateral, organizimin e një forumi të bizneseve të dy shteteve, sikurse edhe bashkëpunimin në fushën e politikës së jashtme, mbrojtjes, sigurisë, shëndetësisë dhe fusha të tjera të interesit të dyanshëm. Kështu ka bërë të ditur presidenca përmes një komunikate.
Duke folur për zgjedhjet e reja në veri, Osmani ka thënë se po punohet për plotësimin e infrastrukturës ligjore që ato të mbahen.
“Në raport me zhvillimet politike dhe të sigurisë në vend, Presidentja Osmani diskutoi edhe për hapat konkret të ndërmarra nga institucionet e Kosovës për shtensionimin e situatës në veri të vendit në përputhje me dakordimin në Bratislavë. Presidentja Osmani theksoi se prezenca e Policisë Speciale të Kosovës në objektet komunale dhe rreth tyre në veri tashmë është zvogëluar, ndërsa po vazhdon puna për plotësimin e infrastrukturës ligjore për mbajtjen e zgjedhjeve të reja në katër komunat e veriut nëpërmjet peticionit të qytetarëve”, thuhet në njoftimin e presidencës.
Presidentja Osmani tutje ka përsëritur ftesën për homologun e saj, presidentin Recep Tayyip Erdoğan për një vizitë në Republikën e Kosovës, në një kohë të përshtatshme për të dy palët.
