Për situatën e krijuar javë më parë në veri të Kosovës, ndërkombëtarët kanë fajësuar përveç Kosovës edhe Serbinë.
Pavarësisht kësaj, Bashkimi Evropian, ka vendosur masa vetëm ndaj Kosovës. Por, në një konferencë për media që pati zëdhënësi i BE-së, Peter Stano, tha se nëse vendet anëtare vendosin, mund të ketë masa edhe kundër Serbisë.
“Gjëja e fundit që kemi bërë në dritën e përkeqësimit të situatës në Veri të Kosovës ishte vendosja e disa masave ndëshkuese kundrejt Qeverisë së Kosovës për shkak të mos-gatishmërisë së kësaj të fundit për të shtensionuar situatën. Nëse shtetet anëtare vendosin atëherë ne do të prezantojmë masat e nevojshme edhe kundrejt Serbisë”, ka thënë Stano.
Tëvë1 ka pyetur BE-në, nëse janë duke e shqyrtuar mundësinë e largimit të masave për Kosovën. Në përgjigjen e tyre, thuhet se kërkojnë që ekzekutivi kosovar të bëjë më shumë për deeskalimin.
“BE-ja mirëpret njoftimin e fundit nga qeveria e Kosovës për një reduktim të mëtejshëm prej 25% të pranisë së policisë brenda dhe përreth ndërtesave komunale në veri të Kosovës. Vendimi është marrë pas takimit të nivelit teknik në mes të Policisë së Kosovës dhe EULEX-it me qëllim përcaktimin e parametrave të përbashkët për vlerësimin e situatës së sigurisë në komunat veriore. Këto janë hapa në drejtimin e duhur, por nevojiten hapa të mëtejshëm”, thuhet nga BE.
Politologu, Fidan Ukaj, thotë se bashkësia ndërkombëtare e ka lidhur largimin e masave me mbajtjen e zgjedhjeve në katër komunat veriore.
Ndërsa, njohësi i çështjeve politike, Ben Andoni, thotë se këto masa u vendosen vendeve si Kosova për t’iu treguar se sa larg integrimit janë.
Deeskalimi është duke vazhduar në bazë të marrëveshjes së Bratisllavës, të cilën Kosova e ka arritur me BE-në më 10 korrik.
