Armend Mehaj, sot ka dhënë dorëheqje nga pozita e ministrit të Mbrojtjes, derisa ka thënë se nga ky post është larguar për arsye familjare.
Por, ish-komandanti i Forcës së Sigurisë së Kosovës, Kadri Kastrati, tha se dorëheqja e sotme e Armend Mehajt nga pozita e ministrit të Mbrojtjes është bërë më së paku për arsye familjare.
“Unë uroj që të jetë për arsye familjare, por personalisht nuk besoj absolutisht, sepse Mehaj është një ushtarak dhe ushtarakët nuk dorëzohen sa i përket plotësimit të misionit. Mirëpo, këtu ka rrethana tjera, duhet t’ia lëmë kohës, koha do e tregojë të vetën, por më së paku mendoj që ka qenë arsye familjare që ministri Mehaj e ka ndërprerë para kohës mandatin e tij”, deklaroi Kastrati në emisionin “Ditari”.
Kastrati ka thënë se për dallim nga pjesa tjetër e Qeverisë Kurti, Mehaj ka dëshmuar partneritet me Shtetet e Bashkuara të Amerikës, për çka atë e ka falënderuar sot edhe ambasadori amerikan në Prishtinë, Jeffrey Hovenier.
“Mbi të gjitha, kjo qeveri do të mbahet mend për prishjen e raporteve me partnerët ndërkombëtar në aspektin politik. Mirëpo, Mehaj përkundrazi i ka ngritur raportet me ta. Ambasadori amerikan e ka dhënë mesazhin e qartë se Mehaj ka qenë në krye të detyrës dhe e ka kryer ashtu siç e kanë dëshiruar partnerët tanë strategjikë”, theksoi Kastrati në Tëvë1.
Madje, ish-komandanti i FSK-së, vlerësoi që Mehaj ka qenë dikasteri i vetëm në Qeverinë Kurti që ka treguar rezultate, ka bërë punë të mirë, e madje ka avancuar Ministrinë e Mbrojtjes e Ushtrinë e Kosovës. /teve1.info/
