Me shqetësim për përshkallëzim të gjendjes dhe përdorim të dhunës, shtetet e QUINT-it, i kanë pritur protestat e serbëve në Kosovë.
Përmes një komunikate, QUINT-i ka konsideruar se qytetarët e kanë vet në duar kthimin e protestave nga paqësore në të dhunshme.
“Qytetarët kanë të drejtë për tubim në mënyrë paqësore si dhe përgjegjësi për të siguruar që tubimet e tilla janë paqësore dhe nuk kthehen në të dhunshme. Organet e zbatimit të ligjit e kanë detyrim të ruajnë rendin publik dhe do të duhej ta bëjnë këtë pa shkelur parimet demokratike të lirisë së shprehjes dhe të tubimit. Quint-i dhe BE-ja gjithashtu i përsërisin thirrjet e tyre Kosovës dhe Serbisë për të vepruar në mënyrë të matur dhe të përmbahen nga çfarëdo retorikë apo veprim që do të mund të ngritë tensionet”, thuhet në komunikantë.
E këto protesta erdhën si pasojë e vendimit të Qeverisë së Kosovës, për moslejimin e zgjedhjeve serbe në Kosovë.
Lidhur me këtë, kryeministri i Kosovës, Albin Kurti i është drejtuar Bashkimit Evropian, ku ka shprehur se kanë pritur që kjo çështje të zgjidhej ndërmjet dy qeverive.
“Është për keqardhje që, derisa Kosova është duke punuar në mirëbesim me BE-në dhe Quint-in për të gjetur një zgjidhje reciprokisht të pranueshme ndërmjet qeverive tona, strukturat ilegale të Serbisë po mundohen të përgatisin dhe të organizojnë zgjedhjet në territorin tonë sikur të mos ekzistonte Qeveria jonë. Dhe janë duke e bërë këtë me financim nga Beogradi, natyrisht”, ka thënë Kurti.
Si përpjekje për ta nënçmuar Kosovën dhe institucionet e saj shtetërore, Kurti i ka vlerësuar edhe përdorimin e termave nga Beogradi për qytetarët serbë nga Kosova.
“Në veçanti, Beogradi e përdor termin “votuesit me të drejtë vote” për t’iu referuar serbëve të Kosovës që kanë shtetësi të dyfishtë. Mirëpo, kjo është sipas regjistrit civil të përcaktuar dhe të poseduar nga strukturat komunale ilegale të Serbisë në Kosovë, duke shkelur kështu Kushtetutën dhe ligjet tona. Është me rëndësi që kjo orvajtje të mos legjitimohet nga autoritetet e BE-së apo të OSBE-së”, ka shtuar ai.
Zgjedhjet parlamentare dhe presidenciale serbe do të mbahen më 3 prill.
Raporti i gazetares Florijeta Dernjani.
