Këtë e ka bërë të ditur ministri i Punëve të Brendshme, Xhelal Sveçla.
“Sot përcollëm nga Kosova grupin e fundit të qytetarëve afganë të cilët ishin të akomoduar në kampin “Bechtel” në Ferizaj. Si Qeveri e Republikës së Kosovës dhe si Ministri e Punëve të Brendshme, kemi pranuar të marrim përsipër këtë proces pa asnjë dilemë dhe me përgjegjësi të lartë”, ka shkruar ai në një postim në Facebook.
Sveçla ka thënë se falë bashkëpunimit me SHBA-në, NATO-n dhe aleatët tanë, janë drejt finalizimit të suksesshëm të këtij procesi.
“Falë bashkëpunimit me Shtetet e Bashkuara të Amerikës, NATO-n dhe aleatët tanë, jemi drejt finalizimit të suksesshëm të këtij procesi. Jemi angazhuar maksimalisht bashkë me partnerët tanë që çdo kërkesë e të strehuarve të plotësohet në afat optimal dhe të sigurojmë mirëqenie e kushte të mira për të gjithë. Jam shumë i lumtur që si shtet ia dolëm mbanë edhe në këtë proces dhe që të gjithë ata që u strehuan në kampin ‘Bechtel’ në Kosovë po nisin një jetë të re në shtetet mikpritëse”, tha ai. /teve1.info/