Gjykata Kushtetuese ka refuzuar kërkesën e Partisë Demokratike të Kosovës për vlerësimin e kushtetutshmërisë së vendimit për caktimin e seancës plenare të 13 korrikut të kryetarit të Kuvendit, me kërkesën që i njëjti në tërësi të anulohet.
Sipas njoftimit, parashtruesit e kërkesës pretendojnë që nuk është respektuar afati për thirrjen dhe caktimin e seancës plenare sipas nenit të Rregullores së Kuvendit, sipas të cilit, mes tjerash, rendi i ditës, së bashku me materialet përkatëse, u shpërndahen deputetëve së paku dy ditë pune para mbajtjes së seancës plenare, përcjell teve1.info
“Gjykata Kushtetuese e Republikës së Kosovës ka vendosur përkitazi me kërkesën për masë të përkohshme në rastin KO 160/23, lidhur me vlerësimin e kushtetutshmërisë së “Vendimit Nr. Ref. L-VIII, SP-119 të datës 11 korrik 2023, për caktimin e seancës plenare të datës 13 korrik 2023, i Kryetarit të Kuvendit të Republikës së Kosovës”. Kërkesa për vlerësimin e kushtetutshmërisë së aktit të lartcekur të Kuvendit është parashtruar në Gjykatë nga dymbëdhjetë (12) deputetë të Kuvendit, bazuar në autorizimet e përcaktuara nëpërmjet paragrafit 5 të nenit 113 [Juridiksioni dhe Palët e Autorizuara] të Kushtetutës së Republikës së Kosovës. Gjykata, me shtatë (7) vota për dhe një (1) kundër, ka vendosur që kërkesa për vendosjen e masës së përkohshme lidhur me aktin e lartcekur, të refuzohet”, bëhet e ditur në njoftim.
Tutje, theksohet se PDK-ja gjithashtu ka kërkuar nga Gjykata që të vendos një masë të përkohshme e të pezullojë edhe të gjitha vendimet e miratuara në seancën e 13 korrikut.
Por kjo kërkesë është refuzuar nga Gjykata, pasi siç thonë ata, “parashtruesit e kërkesës nuk kanë paraqitur ndonjë dëshmi ose arsyetim se pse pezullimi i efektit të të gjitha vendimeve të Kuvendit të miratuara në seancën e 13 korrikut 2023, i kontribuon evitimit të rreziqeve apo dëmeve të pariparueshme dhe për pasojë, interesit publik”. /Teve1.info/
Njoftimin e plotë mund ta gjeni KËTU.
