Ministria e Shëndetësisë që nga viti 2021 disa herë radhazi ka bërë kërkesë për furnizim me insulina, por që disa nga ta, shpesh edhe janë janë zvarritur për shkak të ankesave në OSHP nga operatorët ekonomik.
Edhe qytetari Vehbi Demolli thotë se disa herë ka pasur mungesë me insulina, andaj edhe i është dashur që disa herë të vizitojë QKMF-në për tu furnizuar me to.
E një qytetar tjetër thotë se në rast kur ka mungesë në barnatoren shtetërore, atëherë duhet t’i blejë në barnatoret private.
“Ku ka zgjidhje me ble dikun duhet me kry punë”, thotë qytetari Ferit Maxhuni.
E sipas Ministrisë së Shëndetësisë, arsye e zvarritjes së këtij tenderi është që disa herë radhazi operatorët ekonomik kanë ofertuar me produkte të paregjiststruara dhe pa autorizim për marketing.
Arsye tjetër sipas MSH-së për vonesën e këtij aktivitetit për rreth një vit ka qenë edhe mungesa e panelit shqyrtues të OSHP-së.
“Hapja e ofertave është bërë në Janar të vitit 2021. Procesi është zvarritur për shkak te ankesave në OSHP nga operatori ekonomik i cili ka ofertuar me produkte të pa regjistruara, pa Autorizim për Marketing. Arsye tjetër e vonesës se aktivitetit për rreth një vit ka qenë edhe mungesa e Panelit Shqyrtues të OSHP-së, deri sa është formuar Paneli i ri për shqyrtimin e ankesës.”, thonë nga MSH-ja.
Megjithatë, sipas tyre, furnizimi me insulina po bëhet pa ndërprerje dhe me çmime të tregut.
“Fillimisht MSh është furnizuar përmes UNOPS-it, pastaj përmes kontratave emergjente te lidhura nga MSh kemi arritur që furnizimi me insulina të bëhet pa ndërprerje dhe me çmime të tregut”, bëhet e ditur tutje.
Mirëpo Diellza Luzha, e cila përcjell sektorin e shëndetësisë ndër vite e thotë të kundërten.
Sipas saj, mungesa e insulinave në institucionet shëndetësore është problem aktual tash e sa vite.
“Zvarritja e procesit të tenderit me furnizim me insulina nuk është problemi i parë le të themi me insulina, jemi dëshmitarë tash e sa vite që institucionet tona shëndetësore kanë mungesë të insulinave dhe një gjë e tillë ndikon negativisht tek secili pacient që ka diabet sepse insulina është jetike për shëndetin e tyre. Gjatë këtyre viteve sa e përcjelli sektorin e shëndetësisë kam pranu me qindra ankesa lidhur me mungesë të insulinave në qendra shëndetësore”, deklaroi ajo.
Pas zvarritjes së procesit gati dy vjet e gjysmë të tenderit për insulina në mes të Organit Shqyrtues të Prokurimit Publik, një operatori ekonomik dhe Ministrisë së Shëndetësisë, kjo e fundit e ka rihapur tenderin në vlerë mbi 3.6 milionë euro për 12 muaj.
