Ish-komandanti i Zonës Operative të Llapit, Rrustem Mustafa, i ka reaguar kryetarit të AAK-së, Ramush Haradinaj, i cili në Respublika në Tëvë 1 tha se ‘Remi’ i kishte vetëm 3 javë luftë në Llap, duke e konsideruar ‘turist’.
Mustafa iu ka përgjigjur deklaratave të Haradinaj me një thënie.
“Atë që e bënë njeriu për pak vëmendje nuk e bënë dot asnjëra nga gjallesat për mbijetesë!”, ka shkruar ai në Facebook.
Ndryshe, Haradinaj mbrëmë në Tëvë 1 tha se si ‘Remi’ ashtu edhe Hashim Thaçi në luftë ishin turistë.
“Zoti Thaçi turist është, më falni në shprehje. Turist është, ai ka qëndru në Drenicë, ai ka qëndru në Rogner, ka qëndru diku tjetër. Zoti Rrustem Mustafa turist është. Ka luftuar tre javë Remi në Llap. Ose tjetri ose tjetri, turista janë në UÇK, o djem. E kanë bërë të përkohshëm, përkohësisht hin e dil. Nuk jam duke ju fol pahiri, por po ju fol dikush i cili që nga data 24 mars 1998, shkoni le t’i marrin hetuesit e Kosovës, prokurorët, le t’i hijnë rend Dukagjinit, le t’i pyesin katun për katun: A jeni kanë në luftë, sa vet jeni kanë, kur ja keni nis, çka ka ndodhë me ju?”, ka thënë Haradinaj.
Kjo deklaratë e tij ngjalli reagime të shumta gjatë ditës së sotme.