Fazli Ahmeti, me dhimbje e krenari, po e përkujton djalin dëshmor në përvjetorin e rënies.
Në vitin 1998, Bedri Ahmeti, la kurbetin për t’i dalë në ndihmë vendit.
“Si shumë të ri, ai shkoi në perëndim, e në perëndim ai mori vendim me ardh kha…” u shpreh Fazli Ahmeti.
Komandant Bedi, fillimisht mori pjesë në luftimet në zonën e Dukagjinit dhe Drenicës.
E më pas, siç shihet edhe në këtë video, ai shërbeu si komandant togu në Zonën Operative të Llapit.
Ndërkohë me 24 mars të vitit 1999, ra dëshmor gjatë luftimeve të ashpra me forcat serbe, në fshatin Llapashticë të Podujevës.
E Fazli Ahmetit, i kujtohen momentet kur e kuptoi se i biri i tij, ra në mbrojtje të atdheut.
“Jam tip që më kohë pajtona me do sene. Si e ka marrë pushkën e kom llogarit edhe ata (që ka me vdek)”, tha Fazli Ahmeti.
E në Zabelin e Behramit, vendin ku ra dëshmor Bedriu, këtë 24 mars, u mblodhën sërish bashkëluftëtarët e tij.
Halim Potera, që në këtë video shihet me maskë afër Bedri Ahmetit, i kujton momentet e fundit me komandantin e tij.
“Momentin e vrasjes, ka qenë një tank atje në Tabe, këtu ka qenë një lis i madh, ka gjuajt tenka, unë kam qenë nën lis, Bedi ka qenë këtu, e ka godit lisin, ka eksplodua predha, Bedin e ka godit këtu…”, tha ai.
E plaga që e mori Bedriu nga ajo predhë, Potera thotë se ishte fatale për të.
Në vitin 2017, Bedri Ahmeti u nderua me urdhrin “Hero i Kosovës” nga ish-presidenti, Hashim Thaci.
Ndërsa në përvjetorin e rënies së tij dhe dëshmorëve të tjerë llapjan, familjarët bën homazhe tek varrezat e dëshmorëve në Penuhë.
Raporti i gazetarit Fidan Zejnullahu.
