Kryeministri i Kosovës, Albin Kurti, ka bërë të ditur se katër profileve të vitit shkollor 2022/2023, do t’i shtohen edhe tetë të reja duke filluar nga shtatori.
Kurti ka thënë se nga katër shkolla i arsimit dual po bëhen 21, në gjithsej 13 komuna, ku nga viti i kaluar ishin vetëm tre.
“Arsimi dual po bëhet. Katër profileve të vitit shkollor 2022/2023, po ia shtojmë edhe tetë të reja duke filluar nga shtatori. Nga katër shkolla, po zgjërohemi në 21, në gjithsej 13 komuna, nga vetëm tre sa ishin në vitin e kaluar. Me ministren e Industrisë, Ndërmarrësisë dhe Tregtisë, Rozeta Hajdari dhe ministren e Arsimit, Shkencës, Teknologjisë dhe Inovacionit, Arbërie Nagavci, në dy takime të ndara, për gati katër orë, bashkëbiseduam me përfaqësues të bizneseve të sektorit të përpunimit të drurit dhe atij të ushqimit dhe pijeve për të identifikuar profilet e nevojshme për ta dhe tregun e punës”, ka shkruar Kurti në Facebook.
Tutje, kryeministri ka shkruar se ndërmjet arsimit dhe ekonomisë sot është vendimtare se çfarë shteti dhe ekonomie do të ketë nesër.
“Lidhja ndërmjet arsimit dhe ekonomisë sot është vendimtare se çfarë shteti, ekonomie, do të kemi nesër. Arsimi dhe Aftësimi Profesional përbën një prej projekteve më të mëdha të transformimit të ekonomisë sonë”, ka shkruar Kurti./teve1.info/
