Temperaturat e larta në vend kanë ndikuar edhe në sektorin e shëndetësisë.
Në sezonën e verës në Spitalin Rajonal “ Isa Grezda” në Gjakovë nuk do të ofrohen të gjitha shërbimet.
Kjo meqë në sallat Operative u ndëpre puna për programin e ftohtë, derisa si pasojë e kësaj u ndërprenë operacionet e planifikuara të cilat nuk ishin me urgjencë dhe u shtyen për në shtator të këtij viti.
Përveç temperaturave të larta, për këtë veprim sipas zëdhënësit të këtij spitali, Besart Gashi, ndikuan edhe pushimet vjetore të cilat shkaktuan mungesë të stafit.
“Kemi bërë reduktime në këtë periudhë për shkak të stafit të cilët kanë të drejtë të i shfrytëzojnë pushimet vjetore të tyre Korrik-Gusht, dhe si pasojë e mungesës së stafit bëhet reduktimi i operimeve deri në shtator. Mundet me qenë edhe temperaturat e larta mirëpo më shumë mungesa e stafit…”, deklaroi ai.
Mirëpo e gjitha kjo nuk po shihet e arsyeshme nga Shoqata e Pacientëve.
Besim Kodra nga kjo shoqatë thotë se pacientët duhet të trajtohen në kohë të arsyeshme.
“Padyshim ka me shkaktu probleme, pacientët kanë të drejtë me u trajtu në kohë të arsyeshme që mos me duru dhimbje e vuajtje të padurushme…”, deklaroi Kodra.
E skandaloz dhe të dëmshëm këtë vendim e ka quajtur ish-ministri i Shëndetësisë Armend Zemaj.
“Vendimi i Spitalit të Përgjithshëm ‘Isa Grezda’ në Gjakovë, për ndalimin e operacioneve – programit të ftohtë gjatë muajve të verës është i papranueshëm, i dëmshëm; është skandaloz. Një vendim i tillë është për keqardhje për një shoqëri që problemin më të madh e ka mbijetesën, mirëqenien dhe qasjen minimale për shërbime shëndetësore”, ka vlerësuar Zemaj.
E një gjë e tillë shihet të mos praktikohet në Qendrën Klinike Universitare të Kosovës.
Sipas ShSKUK-së sallat e operacionit janë funksionale edhe gjatë muajve të verës.
“Ju informojmë se sallat e operacionit në klinikat e QKUK-së, janë duke funksionuar dhe nuk ndërprehet puna në to, përjashtuar rastet kur mjekët klinicist vlerësojnë se pacientët nuk mund t’i nënshtrohen operacionit për shkak të gjendjes së tyre shëndetësore. Sa i përket ndëprerjes së programit operativ në Spitalin e Përgjithshëm të Gjakovës, menaxhmenti i ShSKUK-së, nuk është njoftuar nga ky spital, por konform kompetencave ligjore është duke e trajtuar rastin”, thuhet në reagimin e ShSKUK-së.
Vendimi për ndërprerjen e operimeve në Spitalin rajonal të Gjakovës do të jetë në fuqi deri në marrjen e një vendimi tjetër, derisa sallat operative do të punojnë vetëm për rastet urgjente.