Sekretari organizativ i PDK-së, Betim Gjoshi, thotë se kryeministri Kurti e shefja e grupit parlamentar të VV-së, Mimoza Kusari-Lila, tashmë ishte dashur të ftoheshin për intervistim nga Prokuroria.
Kjo pasi që sipas Gjoshit, ata e dinë vendndodhjen e madje koordinohen me Milan Radojiçicin, për të cilin ka urdhërarrest ndërkombëtar.
Reagimi vjen pas disa audioincizimeve ku dëgjohen duke komunikuar Kusari-Lila me atëherë deputetin e Listës Serbe, Slavko Simiq.
“Sot bëhen 10 ditë prej kur janë publikuar faktet me zë të koordinimit kriminal të Albin Kurtit me Milan Radojçiqin përmes Mimoza Kusarit dhe Slavko Simiqit. Prokuroria e Shtetit ende nuk ka ftuar në intervistim Albin Kurtin dhe Mimoza Kusarin si dy njerëz që jo vetëm kanë njohuri se ku ndodhet një kriminel i kërkuar me Urdhërarrest nga Prokuroria Speciale, por edhe bashkëpunojnë e koordinojnë punët shtetërore me të”, ka shkruar Gjoshi.
Sipas Gjoshit, Kurti ka koordinim me Martin Berishajn e Nagip Krasniqin “sepse është i zhytur në korrupsion bashkë me ta” dhe me Kusari Lilën “sepse është i zhytur në koordinim me Radojiçiqin”.
“Nëse Albin Kurti dhe Vetëvendosje do të distancoheshin nga Mimoza Kusari, mund ta merrni me mend se si ajo mund t’ia thyejë kokën kryeministrit të Kosovës”, ka shkruar ai.