Veterani i luftës së UÇK-së, Avni Ajeti, ka bërë thirrje ndaj veteranëve që të jenë në gjendje gatishmërie që të protestojnë, në mënyrë që mos të kalojë Ligji për Pagën Minimale, pasi nuk u mundëson veteranëve të marrin pensionin në lartësi të pagës minimale.
Ajeti shpreson që presidentja e vendit, Vjosa Osmani ta luajë rolin e saj, siç thotë ai “ashtu siç i ka hije”.
“I bëj apel ish-luftëtarëve, bashkëluftëtarëve të mi, që të jenë në gjendje gatishmërie që të protestojnë dhe këtë Ligj mos ta lejojmë që të kalojë. Po shpresoj shumë që presidentja do të dijë që në moment të caktuar ta luajë rolin ashtu siç i ka hije”, tha ish-luftëtari i UÇK-së në emisionin “Ditari” në Tëvë1.
Ai bëri të ditur se në rrethinën e Llapit janë duke u bërë organizime, të cilat synim kanë protestat në të ardhmen.
“Në Llap ka organizime, patjetër që po. Ne patëm një takim me djemtë në Podujevë të përfaqësuesve të shoqatës dhe shpresojmë shumë që do të vazhdojmë. Këta përfaqësues e morën detyrën që të takohen me përfaqësues të tjerë të veteranëve që sa më shumë të organizohemi dhe të jemi prezentë në protesta”, tha ai.
Ajeti tha se e mbështetë pastrimin e listave të “fryra” të veteranëve.
“Kjo është thirrje që neve nuk na pengon, secili qytetarë mund të merr pjesë, është protestë që do të bëhet dhe të mos bien qytetarët në lajthitje, jo bëhet për me i mbrojt veteranët pa qenë pjesë e luftës. Unë personalisht jam që të pastrohen listat dhe të dalim nga ky ngërç dhe të mos bëjmë politikë në emër të tyre. Prandaj, duhet të marrin shumë persona pjesë dhe me dhënë mesazhin që të pastrohen njëherë e përgjithmonë listat e të bëhemi rahat”, shtoi ai.
Gjatë ditës së sotme, presidentja Osmani ka mbajtur një takim me përfaqësuesit e organizatave të dala nga lufta e UÇK-së. Në këtë takim është bërë e ditur se Osmani ka thënë se Ligji për Pagën Minimale ndodhet ende në Kuvend, dhe sapo të arrijë në Presidencë i njëjti do të trajtohet nga ekspertë ligjorë./teve1.info/
