Kryetari i Shoqatës së Familjeve të Dëshmorëve, Xhavit Jashari pas takimit me presidenten e vendit, Vjosa Osmani ka bërë të ditur se veteranët e Ushtrisë Çlirimtare të Kosovës do të mbajnë protestë dhe do të bllokojnë punën e Parlamentit të Republikës së Kosovës.
Kjo sepse sipas Jasharit, Qeveria Kurti ka diskriminuar kategorinë e veteranëve të luftës me Ligjin mbi Pagën Minimale.
Tutje ai në konferencë për media theksoi se gjatë takimit i është bërë kërkesë presidentes Osmani që mos ta nënshkruajë një Ligj të tillë, i cili siç tha ai, diskriminon kategoritë e dala nga lufta.
“I dini qëndrimet e oganizatave të dala nga lufta, kërkesa dhe trysni nga degët që i kemi në Kosovë dhe qëndrimi i përbashkët i joni i tri organizatave të dala nga lufta është që të mbajmë protestë dhe të bllokojmë tutje punën e Parlamentit. Dhe ne i shprehëm shqetësimet tona dhe i bëmë kërkesë presidentes që mos ta nënshkruajë një ligj të tillë i cili diskriminon kategorinë që ka dhënë shumë në luftë, në këtë rast veteranët dhe po besoj edhe në përputhje me ligjet që janë në zbatueshmëri në Qeverinë e Kosovës ku edhe në këto ligje ka plotë shkelje për këto kategori. Dhe ne i thamë që do ti shfrytëzojmë gjithë rrugët ligjore por gjithsesi do ta kundërshtojmë edhe me protestë dhe të bllokojmë deputetët të mos futen në atë parlament, ku kanë fyer skajshmërisht veteranët e luftës. Kundërshtimet tona vazhdojnë, ne veç se e kemi të paralajmëruar protestën për datën 26 korrik, atë ditë që mbahet seanca”, tha ai.
Madje Jashari theksoi se në takim është biseduar edhe për përgjimet e fundit të publikuara në medie mes shefes së Grupit Parlamentar të Vetëvendosjes, Mimoza Kusari – Lila dhe Listes Serbe, për të cilën Jashari tha se kjo Qeveri po koordinohet me ata të cilët në luftë i kemi pasur kundërshtarë.
“Dulën edhe përgjimet sepse i biseduam edhe këto përgjimet që kjo Qeveri ka bërë me ata që i kemi pasë kundërshtarë në luftë, që t’i largojë dhe atakojë veteranët siç kanë kërkuar nga Lista serbe që ti largojnë veteranët nga beneficioni dhe ju them publikisht se ne nuk protestojmë dhe nuk i bëjmë gjithë këto aktivitete për të penguar punën e Parlamentit për një pagë 170 euro, për një benefit të veteranit. Por këtu është shkelë dinjiteti i kësaj kategorie, është shkelë dinjiteti i luftës së lavdishme të Ushtrisë Çlirimtare të Kosovës”, tha ai./teve1.info./
