Një aksident komunikacioni ka ndodhur në një udhëkryq në Vushtrri, rrugës për në fshatin Begaj.
Në këtë aksident janë lënduar tre persona teksa janë përfshirë dy vetura.
Lajmin për teve1.info e ka bërë të ditur Avni Zahiti, zëdhënës i policisë për rajonin e Mitrovicës.
“Tre persona janë lënduar ndërsa janë përfshirë dy vetura. Aksidenti ka ndodhur në një rrugë nacionale të zonës së Vushtrrisë”, ka thënë Zahiti.
Për këtë aksident ka reaguar edhe deputetja nga LDK-ja, Rrezarta Krasniqi.
Ajo ka shkruar se në këtë zonë janë vendosur që moti semaforët por nuk janë funksionalizuar, sipas saj, për shkak të papërgjegjësisë së Ministrisë së Infrastrukturës.
“Para pak minutash u njoftova për një aksident të rëndë në udhëkryqin për fshatin Begaj të Vushtrrisë, atu ku tash e sa kohë janë vendosur semaforët por kanë mbetur pa u funksionalizuar si rezultat i papërgjegjësisë së Ministrisë së Infrastrukturës, çështje kjo të cilën e kam ngritur edhe në Kuvendin e Republikës së Kosovës dhe po bëj thirrje edhe publikisht që të ndërmarrin masa sa më shpejtë ose të lirojnë rrugën, sepse paaftësia e tyre për të qeverisur po sjellë pasoja tek qytetarët. Njëherit, i drejtohem me lutje edhe Stacionit Policor në Vushtrri që të dërgojnë njësite policore aty, së paku në këtë përiudh kur fluksi i qarkullimit të veturave është me i madh me ardhjen e mërgimtarëve”, ka shkruar ajo.
