Deputeti i PDK-së, Hisen Berisha thotë se çdo ditë tjetër e qëndrimit në pushtet të kryeministrit, Albin Kurti dhe Qeverisë së drejtuar nga ai, është në dëm të qytetarëve.
Sipas Berishës ka stagnim në të gjitha fushat.
“Çdo ditë e qëndrimit në pushtet ka treguar se kjo formë e politikbërjes është e rrezikshme dhe e dëmshme për interesat e shtetit dhe qytetarëve. S’po flas veç për çështjet ekonomike dhe sociale. Nëse dikush del dhe më thotë që sot ka një arsim më të mirë, ka një zhvillim ekonomik më stabil, ka një gjendje sociale më të mirë, sot qytetarët janë më të kënaqur, kemi njohje apo në çfarëdo aspekti është më mirë diçka e që s’jemi në gjendje më të keqe se që kemi qenë më 2019, atëherë unë s’qenkam duke jetuar me realitetin”, ka deklaruar ai.
Berisha në Ditari në Tëvë 1, thotë se Kurtit po i ngutet që në ditët e fundit të pushtetit, të bëjë gjithçka që ta kapë çdo sektor.
“E keqja është se këto forma të politikbërjes populiste dhe me improvizime dhe me tendenca për ta kapur komplet procesin dhe sistemin shtetëror, sot e pashë që kishin hartuar draftin e Ligjit të ri për Shërbyesit Publik ndërkohë që drafti që ka ardhë njëherë është në Gjykatën Kushtetuese dhe derisa ai s’del nga Gjykata Kushtetuese nuk mund të ketë të ri. Pra këtij po i ngutet që këto ditë të fundit që po i numërohen të pushtetit, ky të bëjë gjithçka që ta kapë çdo sektor. Pra edhe një administratë ta shndërrojë tërësisht në partiake se jo politike”, ka shtuar Berisha.
