Presidentja Vjosa Osmani e ka përfunduar takimin me emisarin e BE-së për dialogun me Serbinë, Mirosllav Lajçak.
Përpjekjet për deeeskalimin e situatës në veri dhe nevoja për zbatimin e marrëveshjes së Brukselit dhe aneksit të Ohrit ishin tema kryesore të diskutimit, ka shkruar Osmani.
“Presidentja Osmani ka theksuar se institucionet e Kosovës janë të përkushtuara që së bashku me partnerët ndërkombëtarë t`i tejkalojnë sfidat aktuale dhe se Kosova ka demonstruar vullnet për deeskalim, duke ofruar organizimin e zgjedhjeve të reja në veri të vendit, në përputhje me kornizën ligjore të Kosovës”, thuhet në njoftim.
Po ashtu Osmani ka theksuar se grupet kriminale dhe individët që përdorën dhunë ndaj policisë, gazetarëve, pjesëtarëve të KFOR-it, EULEX-it dhe qytetarëve, duhet të përballen me drejtësinë.
“Presidentja Osmani ka theksuar se Kosova mbetet e palëkundur në synimin e saj për paqe dhe stabilitet në vend dhe rajon”, njoftohet në komunikatë.
