Policia e Kosovës ka njoftuar se sot në Fushë – Kosovë ka arrestuar të dyshuarin për posedim droge.
Sipas njoftimit, i dyshuari kishte qenë në një automjet me targa vendore në të cilin gjindeshin edhe dy persona të tjerë.
Teksa thuhet se i njëjti kishte tentuar të ikte nga automjeti.
“Policia e Kosovës, konkretisht Njësia e antidrogës në Prishtinë, pas një pune mjaft profesionale në teren dhe mbledhjes së informatave se i dyshuari me iniciale (G.A.) merret me trafikimin e narkotikeve kanë realizuar një plan taktik, ku sot me datën 03.07.2023, në qytetin e Fushë Kosovës kanë arrit të ndalojnë një automjet me targa vendore në të cilin gjendeshin tre persona, njëri nga ta i dyshuar për posedim droge.Në momentin e ndaljes nga Policia, i dyshuari i lartcekur me iniciale (G.A.) ka tentuar të ik nga automjeti i cili me vete kishte një çantë në kraharor”, thuhet në njoftim.
Bëhet e ditur se policia ka parandaluar ikjen e tij dhe se gjatë kontrollit të dyshuarit i janë gjetur qese me substancë narkotike dhe një shumë e parave.
“Policia ka parandaluar ikjen e tij dhe gjatë kontrollit fillestar në gjepat e pantallonave i ka gjetur: (11) qese me narkotik të dyshuar të llojit Mariuhanë me peshë (10) gramë, një peshore digjitale si dhe (545) euro. Ndërsa, gjatë kontrollit të çantës së kraharorit i janë gjetur: një qese me narkotik të llojit Mariuhanë me peshë (535) gramë, qese me narkotik të llojit Kokainë me peshë (3) gramë, një grinder (mulli) për bluarje të narkotikeve, si dhe një qese e madhe me rreth (1000) paketime të vogla të cilat shërbejnë për ndarje të narkotikeve. Në vazhdim të operacionit në konsultim me prokurorin kujdestar është bastisur edhe banesa e të dyshuarit në qytetin e Fushë Kosovës, por që nuk ka rezultuar me gjetjen e ndonjë sendi të dyshimtë”, thuhet në njoftimin e Policisë.
Tutje thuhet se i dyshuari me urdhër të prokurorit është dërguar në mbajtje për 48 orë.
“Në lidhje me rastin është kontaktuar prokurori Kujdestar nga Departamenti i Krimeve të Rënda në Prishtinë dhe me urdhër të tij i dyshuari i lartcekur (G.A.), tani më i arrestuar dërgohet në mbajtje për 48 orë për procedura të mëtejme ligjore. Policia e Kosovës do të ndërmerr masa dhe veprime rigoroze ligjore ndaj të gjithë atyre personave të përfshirë në vepra penale, në veçanti zero tolerancë do të aplikohet ndaj personave që merren me abuzimin dhe trafikimin e substancave narkotike”, thuhet tutje./teve1.info./