100 euro false i dorëzoi në një barnatore në Prishtinë.
E nga ilaçet që kushtuan vetëm 5 euro, tregtari i parave të falsifikuara i mori 95 euro origjinale.
Por ky është vetëm një prej rasteve të shumta të falsifikimit të parave që u hetuan nga Policia e Kosovës.
Ndërkaq, ankesa të shumta po vijnë nga Shoqata ‘’Konsumatori’’, për kthimin e monedhave metalike dhe të letrës të humbura në tregun e zi të parave.
“Ne kemi pasur ankesa në poenin metalik 2 eurosh, por tash është kthyer me që ajo është eksploatuar, pasi që as taksisti nuk po e merr, e dallon 2 euroshin falso, tash janë kthyer tek monedhat e letrës, 50, 100, 200-she”, Selatin Kaqaniku, Shoqata ‘’Konsumatori’’.
Kaqaniku thekson se konsumatorët janë të anashkaluar nga Qeveria e Kosovës në këtë aspekt.
“Me siguri se do të kishte mundësi parandalimi nëse shteti do ta përmbushte atë obligimin e vet mandator që neve si qytetarë konsumatorë të na informojë, edukojë, arsimojë, vetëdijësojë që ne të jemi partnerë të shtetit edhe në këtë rast. Kemi mbet të anashkaluar, jemi ‘out’ ngjarjeve”, shprehet Kaqaniku.
Se po dëmtohen ekonomitë familjare por edhe bizneset e thotë edhe ekonomisi, Mustafë Kadriaj.
“Përderisa funksionojnë dhe përderisa janë në treg shihet që ata janë jashtëzakonisht të fuqishëm në tregun e zi të parave. Për fat jo të mirë, në vendet ku nuk ka stabilitet nga ana politike, ligjore është një shtrat i përshtatshëm i këtyre dilerëve dhe për fat jo të mirë Kosova dhe rajoni janë një vend i përshtatshëm për ta por faktikisht është dëm për vet shtetet, bizneset dhe ekonomitë familjare në vend”, thotë ai.
Vetëm gjatë javëve të fundit, Policia e Kosovës arrestoi tre persona të dyshuar për shpërndarjen e parave të falsifikuara.
Ndërkaq, vetëm përgjatë periudhës janar – prill të këtij viti u raportuan 363 raste me falsifikim parash.
