Deputeti i LDK-së, Avdullah Hoti thotë se Kuvendi duhet të mblidhet në seancë të jashtëzakonshme për të diskutuar lidhet me sanksionet e BE-së të vendosura ndaj Kosovës.
Sipas tij, Qeveria nuk e ka njoftuar askënd për këtë situatë, përcjell teve1.info
“Më 28 qershor 2023, BE e paska njoftuar Qeverinë e Kosovës për sanksionet e vendosura: suspendimi i MSA-së, suspendimi i projekteve që financohen nga Korniza Investuese për Ballkanin Perëndimor, pezullimi i fondeve të IPA, pezullimi i takimeve të larta dy palëshe dhe masa të tjera. Qeveria e Kosovës nuk e ka njoftuar as Kuvendin e Kosovës dhe as qytetarët për këtë situatë të re. Kuvendi duhet të mblidhet në seancë të jashtëzakonshme për të diskutuar dhe për tu dakorduar për kursin e veprimeve”, ka shkruar ai në Facebook.
Ish-kryeministri Hoti shtoi se vendi nuk mund të udhëhiqet nga një kryeministër e presidente që, siç thotë ai, vendit po i sjellin sanksione.
“Ku është Presidentja e vendit? Pse nuk po e ushtron funksionin e saj? Ky binom po e çojnë Kosovën në një rrugë tjetër, jo në atë të perëndimit. Një gjë është e qartë: Kosova nuk mund të udhëhiqet nga një Kryeministër dhe Presidente, të cilët i sjellin vendit sanksione në vend të integrimit euro-atlantik”, ka shkruar Hoti. /Teve1.info/
