Në Bruksel është duke vazhduar samiti i liderëve të vendeve të Bashkimit Evropian, në të cilin, ndër tjerash temë për diskutim janë edhe tensionet në raportet ndërmjet Kosovës dhe Serbisë.
Këshilli i Bashkimit Evropian (Këshilli Evropian) ka dalë sot me disa konkluza për marrëdhëniet e jashtme, Mesdheun Lindor dhe pika të tjera. Gjatë ditës pritet të debatohet për tekstin e konkluzioneve, i cili tekst është përgatitur për miratim.
Zyrtarët e BE-së shpresojnë se gjatë ditës së premte do të arrihet një kompromis dhe të miratohen konkluzionet.
Në pjesën e konkluzioneve kushtuar Kosovës e Serbisë, pritet që të dyja vendeve t’u kërkohet të bëjnë hapa të menjëhershëm për t’i ulur tensionet.
“Këshilli Evropian dënon incidentet e fundit në veri të Kosovës dhe bën thirrje për shtensionim të menjëhershëm të situatës, në bazë të elementeve kyçe që tashmë janë shfaqur nga Bashkimi Evropian më 3 qershor 2023”, thuhet në këtë tekst.
Sipas këtij teksti, “palët duhet të krijojnë kushte për zgjedhje të parakohshme në të gjitha katër komunat në veri të Kosovës. Dështimi në uljen e tensioneve do të ketë pasoja negative”.
Tutje theksohet se vazhdimi i dialogut të lehtësuar nga BE-ja është esencial, si dhe zbatimi i marrëveshjes drejt normalizimit, përfshirë këtu edhe themelimin e Asociacionit të komunave me shumicë serbe.