Teutë Rrusta, Sekretetare e Përgjithshme e PSD-së vlerëson se kriza aktuale në veri ka qenë e shmangshme.
“Në fakt krejt kriza në veri ka qenë e shmangshme. Ne i kemi krejt veprimet të cilat kanë qenë absolutisht të evitueshme. Ne e kemi një proces problematik të dialogut që ka vazhduar e në të njëjtën kohë kush ka qenë në vijën e parë të frontit, kanë qenë banorët serbë në veri, për të cilët askush nuk e ka ngritur shqetësimin. As Qeveria jonë e cila i ka përgjegjësi dhe detyrë”, ka thënë Rrusta në InfoNata në Tëvë 1.
Sipas Rrustës, ka arsye të besohet që as kryeministrit kosovar, Albin Kurtin dhe as presidentit serb, Aleksandar Vuçiq iu konvenon të mos zgjidhet konflikti.
Sipas saj Kurti dhe Vuçiqi janë “sikur të shikohet në pasqyrë njëri-tjetri”.
“Për me e përmbledh krejt këtë diskutimin që jemi duke e bërë, është që në fakt margjinat e dialogut dalin me kanë problemi kryesor. Ne e dimë në një situatë kur Serbia refuzon plotësisht për me të njoft, krijimi i një Asociacioni e përjetëson njëfarë konflikti në Kosovë. Unë kam arsye të mjaftueshme me besu që një figurë politike populiste si kryeministri Kurti, por edhe Vuçiqi që janë pak disi si me e këqyr në pasqyrë njëri-tjetrin, të përmasave të ndryshme sepse edhe vendet janë të përmasave të ndryshme, kam arsye me besu që këtyre edhe iu konvenon mos me zgjidhë konfliktin”, shtoi tutje ajo.
