Deputeti, Haki Abazi vlerëson që do të ishte gabim nëse institucionet e Kosovës reagojnë pas një shpalljeje potenciale të Asociacionit nga serbët, nesër për ‘Vidovdan’.
Abazi konsideron që një reagim i mundshëm i institucioneve do t’ia rriste rëndësinë Asociacionit në arenën ndërkombëtare.
“Unë mendoj që do të ishte gabim jashtëzakonisht i madh nëse institucionet e Kosovës reagojnë për çfarëdo vendimi që s’ka peshë juridike e as bazë kushtetuese. Do t’ia rriste rëndësinë realisht edhe në arenën ndërkombëtare, edhe në mobilizimin e brendshëm. Kot është ajo punë. Nuk zgjidhet ky problem me veprime të njëanshme. Serbët munden me 4 % të popullatës që janë në Kosovë me shpallë çkado që duan por realisht edhe në mënyrë praktike, zbatueshmëria e cilitdo vendim ka me qenë i pamundur në aspektin praktik, përderisa nuk ka vullnet politik”, ka thënë Abazi në Këndin e Debatit në Tëvë 1.
Madje sipas Abazit shpallja potenciale e Asociacionit nesër për ‘Vidovdan’ i vë në pozitë të keqe serbët para ndërkombëtarëve.
“Do të ishte njëfarë momenti i rëndësishëm me i kallxu Brukselit që kemi të bëjmë me një palë që është e painteresuar të arrij në fund të procesit. Po mendon të krijoj forma alternative të sjelljes para aktit të kryer”, deklaroi ai.
