Avokati, Skender Musa vlerëson se deri te vendimi i Gjykatës në Kralevë të Serbisë për lirimin e policëve të kidnapuar të Kosovës ka ardhur pas presionit të Bashkësisë Ndërkombëtare.
Kjo pasi, siç thotë Musa, Serbia nuk e njeh realitetin e ri në Kosovë.
“Në aspektin procedural dhe juridik do të thotë që pas ngritjes së aktakuzës iu ka ndërpre masa e caktuar e paraburgimit dhe janë lënë që të mbrohen në liri. Ndërkaq në aspektin praktik dihet mirë që ka pasur një presion të Bashkësisë Ndërkombëtare sepse do të ishte e pamundshme që policët e Kosovës të lirohen nga gjykatat e Serbisë, të mbrohen në liri, duke e pasur parasysh faktin që ata jetojnë në Republikën e Kosovës ndërsa Serbia është shtet që nuk e njeh realitetin e ri të krijuar në Kosovë”, ka thënë ai në Info Nata në Tëvë 1.
Musa po ashtu e konsideron aktakuzën ndaj policëve si të pabazuar.
“Në bazë të asaj që kemi parë dhe kemi lexuar, duke pasur parasysh faktin që është ngrit aktakuza, vetëm është ndërpre masa e sigurisë ndërkaq ka mbet në fuqi një aktakuzë që në fakt është e pabazuar se ata në fakt akuzohen për trafikim me armë, armëmbajtje pa leje, armëmbajtje të eksplozivit e kështu me radhë, duke mohuar se këta kanë qenë policë të Kosovës dhe armët e tyre janë të gjitha me autorizim shtetëror dhe në anën tjetër sipas informacioneve që kemi dëgjuar edhe më herët sidomos nga Natasha Kandiq, policët e Kosovës madje kanë qenë edhe zyrtarisht nën përcjelljen e familjarëve të viktimave në gjykatat e Serbisë, çka do të thotë që Serbia e njeh policinë e Kosovës si strukturë shtetërore të vendit tonë”, ka thënë Musa.
