Muhaxhiri theksoi se kjo është një çështje e cila duhet të trajtohet me delikatesë, duke shtuar se e drejta në këtë rast është në anën e Kosovës.
“Është një çështje e cila duhet të trajtohet me delikatesë. Pra, për fat të keq ndonjëherë nuk ka rëndësi në anën e kujt është e drejta por si prezantohet ajo e drejtë. E drejta në këtë rast natyrisht që është në anën e Kosovës, mirëpo Serbia po dëshiron ta prezantojë si cenim të së drejtës fundamentale të qytetarëve serbë për ta ushtruar të drejtën e votës. Dhe kjo është pra, kjo është e papranueshme për asnjë vend demokratik. As për BE as për Shtetet e Bashkuara, nëse është kështu. Ne jemi mësuar me Serbinë që i ka narracionet e deformuara dhe për këtë arsye ajo zakonisht i prezenton në mënyrë tjetër, pra e jep një të vërtetë të deformuar. Edhe këtë është duke e bërë edhe në këtë rast”, tha ai.
Njohësi i çështjeve politike shtoi se kryeministri Albin Kurti po dëshiron që Serbia ta pranojë Kosovën si palë të barabartë.
“Pra ajo që kryeministri Kurti po e dëshiron, e tha edhe sonte, që po dëshiron që Serbia ta pranojë Kosovën si palë të barabartë. Pra në momentin kur i drejtohet me një kërkesë për mbajtjen e zgjedhjeve kjo nënkupton dhe njohjen defakto. Serbia nuk besoj se do ta pranojë këtë. Ka pas tendenca që të përfshihen ndërmjetësues si QUINT, OSBE, e kështu me radhë por duket që kryeministri Kurti nuk e ka pranuar këtë ofertë”, shtoi Muhaxhiri. /Teve1.info/
