Ministri i Punëve të Brendshme, Xhelal Sveçla ka thënë se Republika e Kosovës vlerësohet nga të gjithë si shteti më demokratik në Ballkan, duke ruajtur dhe promovuar vlerat dhe parimet bazë të të drejtave të njeriut.
Sveçla thotë se situata e sigurisë në veri të Kosovës mbetet e brishtë, mirëpo përkundër të gjitha rrethanave dhe sfidave, Policia e Kosovës dhe të gjithë aktorët e sigurisë vazhdojnë të angazhohen maksimalisht për ofrimin e sigurisë për vetën dhe për të gjithë qytetarët pa dallim.
“Situata e sigurisë në veriun e vendit tonë vijon të mbetet e brishtë mirëpo përkundër të gjitha rrethanave dhe sfidave me të cilat ballafaqohemi, Policia e Kosovës dhe të gjithë akterët e sigurisë po vazhdojnë të angazhohen maksimalisht dhe suksesshëm për ofrimin e sigurisë për vendin dhe të gjithë qytetarët tanë pa dallim. Republika e Kosovës vlerësohet nga të gjithë si shteti më demokratik në Ballkan, duke ruajtur dhe promovuar vlerat dhe parimet bazë të të drejtave të njeriut”, ka shkruar ministri në Facebook.
Ai tha se çdo i burgosur ka të drejtat e tij të garantuara me ligjet e Kosovës dhe ato ndërkombëtare, teksa për veprat dhe shkeljet ai tha se ballafaqohet me drejtësinë.
“Çdo i burgosur ka të drejtat e tij të garantuara me ligjet tona e me ato ndërkombëtare, teksa për veprat dhe shkeljet ligjore ballafaqohet me drejtësinë. Ky për ne është një parim themelor i cili vlen ndaj të gjithëve dhe pa dallim etnie”.
Gjithashtu, Sveçka ka shkruar se mbrëmë e ka parë videon të cilën e ka quajtur “denigruese” ndaj një të arrestuar, i cili ndodhej në ndalim në Drejtorinë Rajonale të Mitrovicës së Jugut, ku thotë se zyrtari policor që e ka kryer këtë akt është suspenduar nga puna.
“Mbrëmë përmes mediave kam parë videon denigruese ndaj një të arrestuari teksa ndodhej në ndalim në Drejtorinë Rajonale të Mitrovicës së Jugut. Zyrtari Policor i cili ka kryer këtë akt, mbrëmë është suspenduar nga detyra dhe po vijojnë procedurat hetimore nga IPK”, ka shkruar ai.
Ai thotë se pa asnjë hezitim ka ftuar Inspektoratin Policor të Kosovës që të fillojë hetimet për këtë rast.
“Kam përgëzuar dhe vazhdoj të përgëzoj secilin aksion të organeve tona që bëhet me qëllim të krijimit të një ambienti të qetë e të sigurt, për mirëqenie, barazi e drejtësi për të gjithë dhe pa dallim. Mirëpo, inçizimi i të arrestuarit apo të burgosurit është absolutisht i papranueshëm dhe është i dënueshëm me të gjithë mekanizmat ligjor në dispozicion. Prandaj, pa asnjë hezitim dje kam ftuar Inspektoratin Policor të Kosovës që të fillojë menjëherë hetimet për këtë rast”./teve1.info/
