Presidentja e Kosovës, Vjosa Osmani ka kërkuar unitet midis institucioneve dhe partive politike për t’i përballuar sfidat aktuale në të cilat po kalon vendi.
Në një komunikatë për medie të lëshuar nga Zyra e Presidencës thuhet se përveç takimeve të vazhdueshme me krerët e institucioneve të venditOsmani e ka parë të nevojshme që të mbajë komunikim të rregullt edhe me partitë opozitare.
“Presidentja ka vlerësuar se bashkëpunimi dhe dialogu i hapur ndërmjet institucioneve dhe partive politike janë thelbësore për t’i përballuar sfidat aktuale dhe për të punuar së bashku drejt arritjes së synimeve të përbashkëta që përfshijnë mbrojtjen e tërësisë territoriale, sovranitetit dhe kushtetutshmërisë si dhe fuqizimin ndërkombëtar të Republikës, sikurse edhe në përmbushjen e prioritetit tonë shtetëror, anëtarësimin në NATO dhe BE”, thuhet në njoftim.
Osmani ka zhvilluar një takim me kryetarin e Aleancës për Ardhmërinë e Kosovës, Ramush Haradinaj, ndërsa, kryetari i PDK-së, Memli Krasniqi dhe ai i LDK-së, Lumir Abdixhiku e kanë refuzuar ftesën për takim.
“Presidentja ka shprehur keqardhje që partitë e tjera opozitare kanë refuzuar mundësinë që ta japin kontributin e tyre për çështje të interesit nacional, përfshirë përpjekjet për fuqizimin e aleancave strategjike e ekzistenciale të Republikës së Kosovës me partnerët, e në veçanti me Shtetet e Bashkuara të Amerikës”, thuhet në njoftim.
