Gjeneralmajor Angelo Michele Ristuccia, komandant i misionit të NATO-s në Kosovë, tha se falë angazhimit të KFOR-it, në Kosovë u shmang një masakër.
Ristuccia duke folur për situatën e krijuar më 29 maj, tha se atë ditë trupat e tij shpëtuan 15 policë të Kosovës.
“Falë profesionalizmit të njerëzve tanë nga e gjithë KFOR-i, të cilët u përgatitën në mënyrën më të përshtatshme dhe që zbatuan rregullat e angazhimit në mënyrën më korrekte, u shmang një masakër. Ne arritëm që t’i ndajmë të dy palët dhe shpëtuam 15 policë të bllokuar në turmë”, tha ai.
Tutje ai shtoi se nëse KFOR-i nuk do të vepronte profesionalisht, sot do të merreshim “me një problem krejt tjetër”.
“Arsyeja pse situata nuk u përshkallëzua ishte fakti që ishim të përgatitur shumë mirë. Ushtarët tanë vepruan shumë, shumë profesionalisht. Dhe dëshiroj të shpreh mbështetjen time të plotë për të plagosurit tanë dhe familjet e tyre. Ata vepruan aq profesionalisht, saqë mundën të menaxhonin forcën që të mos përshkallëzohej situata, kështu shpëtuam 15 policë të Kosovës, penguam të dy palët të përplaseshin, përndryshe do të duhej të merreshim me një problem tjetër krejtësisht të ndryshëm”, thotë Ristuccia për agjencinë italiane të lajmeve AGI.
Sipas Ristuccias, dhuna u krye “nga një numër i vogël ngatërrestarësh të dhunshëm që përdorën çdo mjet për të bërë dëm, përdorën mjete ofendimi deri në kufirin vdekjeprurës”.
“Aktualisht situata është shumë komplekse, e tensionuar dhe e paqëndrueshme. Këto ditë në dukje është e qetë, por mbetet shumë e paqëndrueshme. Hera e fundit kur incidente të tilla kanë ndodhur ishte viti 2004. Prandaj, në të kaluarën janë arritur shumë rezultate pozitive, dhe fakti se numri i trupave të KFOR-it ka rënë në mënyrë drastike nga viti 1999 deri në vitin 2023 tregon qartë se janë arritur shumë rezultate. Megjithatë, për fat të keq, dinamika aktuale na bën shumë, shumë të shqetësuar për këto rezultate. Ne kemi nevojë që të dyja palët të qetësojnë menjëherë tensionet, për të gjetur zgjidhje vetëm me politikë dhe diplomaci”, saktësoi Ristuccia.
Për italianin, 99 % e njerëzve në Kosovë duan të jetojnë në paqe teksa shton se duhet zgjidhje politike.
“Të gjithë njerëzit, pavarësisht nga feja, etnia, prejardhja, kultura e tyre, kanë nevojë që situata të mos përkeqësohet më tej. Unë mendoj se 99.9% e njerëzve këtu në Kosovë duan të jetojnë në paqe. Dhe mendoj se është gjithashtu në interes të të dyja palëve të zgjidhin situatën, prandaj u bëj thirrje sërish të dyja palëve të shmangin çdo retorikë të panevojshme”, tha ai, transmeton teve1.info.