Kurti: Serbia ta ndalë dezinformatën dhe të lirohen menjëherë policët

Kryeministri i Kosovës, Albin Kurti i ka bërë thirrje Serbisë që t’i lirojë menjëherë tre policët e kidnapuar.

Ai ka thënë se Serbia duhet ta ndalojë dezinformatën dhe t’i lirojë tre policët e Kosovës, që u kidnapuan brenda territorit të Kosovës më 14 qershor.

Kurti ka thënë se është konfirmuar se policët kosovarë janë kidnapuar dukshëm brenda territorit të Kosovës. Ai në konferencë për media tha se policët ishin duke ngrënë drekë kur u rrethuan nga forcat serbe.

“Tani e kemi të konfirmuar se 3 policët tanë të ndaluar ilegalisht, u zunë në pritë dhe u rrëmbyen nga forcat serbe gjatë pushimit të përbashkët të drekës gjatë një patrulle rutinë kontrabande në territorin e Kosovës. I bëj thirrje Serbisë t’i ndalojë dezinformatat dhe t’i lirojë menjëherë policët tanë”, ka shkruar Kurti në Twitter.

Drejtori i të ashtuquajturës Zyre për Kosovë në Qeverinë e Serbisë, Petar Petkoviq të martën ka akuzuar Kurtin dhe ministren e Jashtme të Kosovës, Donika Gërvalla, se “po gënjejnë dhe se nuk ka pasur kidnapim”.

We have now confirmed that our 3 illegally detained police officers were ambushed & abducted by Serbian forces while on a joint lunch break from a routine smuggling patrol well w/in Kosova territory. I call on Serbia to stop the disinformation & release our officers now.

— Albin Kurti (@albinkurti) June 20, 2023