Ministrja e Punëve të Jashtme dhe Diasporës, Donika Gërvalla – Schwarz ka thënë se tre oficerët e rrëmbyer nga Serbia janë vizituar nga shefi i zyrës ndërlidhëse të Kosovës në Serbi, Jetish Jashari.
Ajo tha se të tre ata kanë dhënë deklarata të njëjta gjatë kohës sa kanë qenë me Jasharin, duke treguar se janë rrethuar dhe më pas kidnapuar nga rreth 15 persona të forcave serbe.
“Sot, ambasadori Jashari, është takuar me tre oficerët, Beqir Sefa, Rifat Zeka, Shemë Mustafa, të cilët janë rrëmbyer në territorin e Kosovës më 14 qershor. Vizita është realizuar në Qendrën e Paraburgimit në Kralevë, ku tre oficerët janë duke u mbajtur nga 16 qershor. Takimet janë mbajtur ndaras, pra me secilin nga 15 minuta. Secili prej oficerëve ka përshkruar ngjarjen e rrëmbimit të tyre nga momenti i kapjes deri të dalja para prokurorit dhe gjykatësit në Gjykatën e Kralevës më 16 qershor. Ata kanë deklaruar si në vijim: Më 14 qershor 2023, rreth orës 12:30 duke ngrënë dreken, papritmas janë rrethuar nga rreth 15 persona të uniformuar, të cilët më vonë kanë rezultuar të jenë pjesëtarë të forcave të sigurisë të Serbisë, të cilët i kanë sulmuar dhe çarmatosur dhe me thes në kokë i kanë dërguar në veturat e tyre. Me rastin e sulmit ndaj tre policëve, zoti Sefa ka theksuar se disa nga pjesëtarët kanë shkrepur armët në ajër sipas të gjitha gjasave, mendon ai, për të shkaktuar panik tek oficerët policorë dhe për të ta bërë më të vështirë rezistencën e tyre”, tha ajo.
Kryediplomatja kosovare, ka folur edhe për gjendjen e zyrtarëve policor, me ç’rast ka deklaruar se ata nuk janë keqtrajtuar por që nuk janë duke u ushqyer në mënyrën e duhur.
“ Ata pas rrëmbimit janë dërguar në Rashkë, pastaj nga aty janë dërguar në Beograd. Kanë theksuar që gjatë kësaj 48 orësh nuk janë keqtrajtuar, por nuk janë ushqyer në mënyrën e duhur. Ata tani janë të vendosur në dhoma të veçanta dhe nuk kanë qasje në as një media. Trajtimi i tyre është korrekt”, u shpreh ajo.