Këshilli për Mbrojtjen e të Drejtave dhe Lirive të Njeriut (KMDLNj), ka kërkuar nga Komiteti Ndërkombëtar i Kryqit të Kuq të Gjenevës që t’i vizitojnë tre policët e kidnapuar një javë më parë nga Serbia, raporton teve1.info
Përmes një reagimi publik, KMDLNj po ashtu u ka bërë thirrje politikanëve të Kosovës që mos të bëjnë deklarata për gjendjen e policëve të kidnapuar, sipas KMDLNj-së, politike dhe pa e ditur gjendjen e tyre.
“Është joserioze nga një politikan që të deklarojë se ndaj policëve kosovarë është përdorur dhunë në kohën kur nuk e kanë asnjë informatë të vetme. Vetëm sa shqetësojnë familjarët dhe opinionin duke shpërndarë informata të pavërtetuara. Apo se policët e rrëmbyer janë të burgosur politikë kur nuk kanë as aktakuzë të ngritur apo vendim të gjykatës të formës së prerë. Ky është keqpërdorim flagrant i postit, për qëllime politike”, thuhet në reagimin e KMDLNj-së.
Po ashtu, KMDLNj ka ftuar opozitën në Kosovë që të mos e akuzoj Qeverinë për fatin e policëve të rrëmbyer.
“Opozita nuk ka të drejtë të akuzojë qeverinë për fatin e policëve të rrëmbyer për faktin se edhe nëse ata do të ishin në pushtet nuk do të bënin asgjë më shumë. Institucionet e Kosovës janë krejtësisht të pafuqishme të bëjnë diç më shumë përjashtuar këtu sigurimin e mbrojtjes ligjore duke paguar mbrojtjen e tyre sikur edhe shpenzimet për familjarë nëse ata kanë nevojë për shpenzime që ndërlidhen me rastin”, thuhet në reagim.
KMDLNj është shprehur se shpreson që policët do të lirohen shpejt, derisa ka porositur institucionet e Kosovës që nga, siç e ka quajtur KMDLNj, pësim, të mësoj për të ardhmen.
“KMDLNj –ë shpreson se policët e rrëmbyer do të lirohen shpejtë, se ata janë mirë me shëndet dhe se ndërkombëtarët e kanë në duar dinamikën e lirimit të tyre për faktin se kanë kërkuar lirim të pakushtëzuar.
Komiteti Ndërkombëtar i Kryqit të Kuq i Gjenevës ka mandat t’i vizitojë rastet me ndjeshmëri të lartë dhe, në bazë të vlerësimit të tyre edhe mund t’i vizitojnë policët e rrëmbyer. Se a do të ketë kohë ta bëjnë këtë mbetet të shihet shkaku se KMDLNj –ë mendon se policët do të lirohen në ndërkohë.
KMDLNj –ë uron që kjo çështje të përfundojë sa më parë dhe se Policia e Kosovës, nga ky pësim (e nuk është pësimi i parë) do të nxjerrë mësime për të ardhmën në mënyrë që të sigurojë një mbrojtje efektive për policët që kontrollojnë kufirin me Serbinë”, thuhet në komunikatën e KMDLNJ-së.