Komuna e Prishtinës e ka filluar të hënën aksionin për largimin e qenve endacak nga rruga dhe dërgimin e tyre në strehimore, raporton teve1.info
Sipas komunikatës për medie nga Komuna e Prishtinës, ky veprim është marrë në vazhdën e trajtimit të qenve endacak me vendim të kryetarit Përparim Rama.
“Të hënën në mbrëmje, si vazhdim i veprimeve të shumta për trajtimin e qenve endacak, Kryeqyteti me vendim të kryetarit, Përparim Rama, ka nisur aksionin për largimin e këtyre kafshëve nga rruga dhe dërgimin e tyre në strehimore të licencuar nga agjencia e veterinës dhe ushqimit, ku do të trajtohen si duhet dhe përgatiten më pas për adoptim”, thuhet në komunikatë.
Sipas njoftimit, nisjen e këtij aksioni e kanë përcjellë drejtori për siguri dhe emergjenca, Lulzim Fushtica dhe këshilltarët Bajram Gecaj e Pëllumb Bajçinovci.
“Ky aktivitet do të vazhdojë për ditët në vazhdim. Qëllimi është që qentë të largohen nga rruga dhe të vendosen në strehimore të licencuar nga AVUK-u, ku do të trajtohen në mënyrë humane, dhe komuna do të vazhdojë të subvencionojë këtë strehimore për qentë që do t’i mbajë, ku do t’i përgatisim edhe për adoptim” ka deklaruar Fushtica.
