Të reshurat e shiut nuk po ndalen. Për këtë shkak, Shaban Kasumi nga Vushtrria e ka të pamundur të punojë të mbjellat.
Nga lagështia e madhe, ai po ballafaqohet me vështirësi në punën e tij.
“Po vonohen se s’po le koha. Kemi vonu me i punue, po vonohemi tash edhe me i stërpikë edhe me i ru është problem i madh shumë është se përditë po bjen shi, zor edhe në arë me hi është…”, thotë ai.
Madje nga vërshimet që ndodhën në këtë komunë, bujqit kanë pësuar dëme tek të mbjellat.
“Sektori i bujqësisë nuk është në gjendje të mirë për shkak të reshjeve për një periudhë shumë të gjatë. Dhe nga këto vërshimet e fundit ka edhe dëme”, thotë Ergin Sungur, drejtor i Bujqësisë në Komunën e Vushtrrisë
Megjithatë, ky nuk është problemi i vetëm me të cilin ballafaqohet ai dhe fermerët e tjerë.
Sipas Federatës Sindikale të Bujqve, sëmundjet nga insektet po zhvillohen me shpejtësi të madhe në territorin e Kosovës.
Përveç kësaj, është paraqitur edhe ndryshku, sidomos tek të mbjellat me grurë.
“Mos mundësia e bujqve me i trajtu grurin me fungicide për me mbrojt prej ndryshkut dhe kundër parazitëve tjerë, tek një numër i bujqve është paraqitë ndryshku i cili po përhapet me shpejtësi dhe po zhvillohet me shpejtësi të madhe dhe në këtë mënyrë frikohemi se do të kemi ulje të madhe të rendimentit dhe prapë se prapë nuk do të mund ta arrijmë t’i afrohemi përqindjes të sigurimit të bukës për popullatën”, shprehet Tahir Tahiri kryetar i kësaj federate.
Sipas Tahirit, shumë bujq kanë mbetur madje pa i mbjellë kulturat bujqësore shkaku i reshjeve të shumta.
